انا حر

مدونتي الخاصه للتعبير عن كل ما يجول بخاطري دون اي قيود ..

رمضان كريم

رمضان كريم

رمضان كريم يا جماعة وينعاد علينا وعليكم بالصحه والعافية , والله يعينا على الحر والشوب السنه بس كل بثوابوا …

وكل عام وانتم بخير ..

للكبار فقط !!

الموضوع اليوم للكبار فقط وخاصه الشباب ..

اليوم وانا مروح كالعاده من يوم طويل طبعا مروح مشي .. شفت بنت محجبه او بالاحرى لابسه منديل بس عشان المحجابات ما يزعلو المهم الاخت لابسه ما يسمى (تايد) !!! انا كان نفسي اسالها سؤال صغير يعني لما تلبسي منديل وتايد شو بتهيئلك مثلا شو بتتخيلي يعني عنجد كان نفسي اسالها وانو البنت فايعه وما حده قدها الغريب بالموضوع انو صاحبيتها بدون منديل بس محتشمه اكتر منها ..

السؤال اللي بطرح نفسو يعني بدك عيون الشباب تاكلك وانتي لابسه التايد بتكوني مبسوطه وحاسه حالك واو يعني واسمك فايعه الله ينعن هيك موضه ازا هيك وينعن اللي خلاكي تطلعي على هيك شكل لو انك بدون منديل الطف شوي ..

والله مستعان ..

كلو غالي ..

من زمان ما كتبت 🙂

اليوم بدي احكي عن البنزين انا طبعا ضد الغلا للبنزين لانه انا من الشعب وراح ياثر علي بس انا عندي سؤال لاصحاب السيارات اللي مدخنين كم سعر الباكيت طبعاا ما بدخن غير الدخان النضيف على اساس ما راح يعمل مشاكل ولا راح ياثر على الرئه !!!

وزعلان حضرتك على دينارين زياده على البنزين , طيب بلاش القعده بالكافيه كم بتكلفك ؟؟ اقلها 20 دينار هاد ازا مش طالب غير ارجيله و قهوه وزعلان على البنزين , جد غريب البني ادم بتزعل على اشياء وفي اشياء اولى بغض النظر انه زياده البنزين في وراها اشياء كتير بس يعني اشي ومنوو .

طبعا ما راح احكي عن الكهربا لانه بعد فتره راح نسير على البطاريات نمشي اوفر … وبما انه اخر فتره كله مرتفع الاسعار ناار خلي الجو يكون نااار ليش زعلانين يا جماعه ..

ودمتم بود …

بندورتنا العزيزه ما بدك ترجعي ؟؟

  …عزيزتي البندوره

 تركتينا وسافرتي على بلاد الوقواق وصرتي غاليه صرتي 80 قرش للكيلو عمرو ما صار !!  بكره الحكومه بتعمل دعم للبندوره وبصير عنا وزير البندوره والنواب بلاقو اشي يحكو عنه بالمجلس وبرفعو الثقه عن وزير البندوره وبعدها بكم يوم بتظاهرو الناس عشان فساد الي بصير عشان البندوره ولحق ..  كل هاد عشان سافرتي بره ..

 …وبصيروا الشباب تسافر عشان تقدر تشتري كم كيلو والاهالي بطلبو بوكستين بندوره مهر و3 متاخر

…الله يرحم ايام ما كنت ب 20 للبوكسه وما كان يشتريكي فجأه صرتي عزيزه وب 80 قرش للكيلو , راح يمر علينا ايام نتصور جنبك ونشم ريحتك ونضل ماشيين

…ارجعيلنا يا بندوره بعرضك الكيلو ب 80 قرش عشان تسافري بره

حالتنا حاله !!!

حالتنا حاله يا جماعه اللي مش ملاحظه يقرا الاخبار اليوميه حتى لو بتكذب الجرايد او المواقع , مش معقول كل ما حده حكى كلمه نسحب مسدس ونطخ وين احنى مش هيك يعني ولا ازا واحد رمى علي تلج اطخوا برجلو !!!

ولسه هاد ولا اشي شوفو الجرائم اللي اخر موضه اللي صايره تطلع ما راح احكي لانه ما بنفع بس هاد لينك بحث صغير عن الموضوع

http://bit.ly/IZJzLF

يا جماعه الله يجيرنا من الجاي الوضع بالمره وحالتنا حاله ويا سلام على الناس اللي بتموت عشان شو عشان 20 قرش !!!!!!

 والله لو انو 20 مليون ما كان حد سال بس 20 قرش لا كيف ياخدهم مني

والاحلى من هاد كلو هاي الصور

والله على راسي يوسف الله يحي اصلك فرحت الشباب

  !!على شو كسرتو الدنيا !!! هدول همه الشباب اللي بدهم يحاربو الفساد !! عمرو الفساد ما ينكشف ازا بدنا نضل هيك

هدول الشباب اللي بدهم يعمرو المستقبل وبدهم يطورا الحضاره !!!!

ويا جماعه لا اتاخذونا طولنا اليوم …

خلاف الواقع ..

كتير منا بحكي اشي وبعمل خلافو طيب ليه ؟! وين المشكله ؟؟ المشكله انو الواحد فينا بفكر انو هوه الاحسن بين الناس وانو الناس التانيه غلط وهوه الصح, طيب كيف ما في حد كامل يا بني آدم ..

وما بدي احكي عن المثل الاكبر النواب خلال الحمله ما شاء الله بعمل انو راح يقلب الدنيا وبعد ما يقعد على الكرسي ما بتشوف اشي هاد ازا شفتو اصلا !!!

ولا بدي احكي عن اصحاب الدين وسامحوني يا جماعه بس بتلاقي لحيتو طويله وما شاء الله 🙂 وهوه ما شاء الله مش مخلي او بفتي !! يعني الاخ مفتي ولا كيف يعني …

ولا اللي بمدحك قدامك وبس تلف ضهرك ببلش فيك وما بخلي … انو شو يعني اسمي هاد الحكي بمزح الاخ هوه ما بحكي عني لا بس مزح …

ولا بدنا نحكي عن اللي بكون يحكي عن غيروا وهوه سيد الخطأ ولكم ارحموني مشان الله .. هاد الوضع تعبتوني منو بكفي نفاق بنضحك على حالنا .. مش اكتر …

وبالاخير الله المستعان …..

واخيرا تحقق الحلم

واخيرا تحقق الحلم , صبرت ونلت بعد شهر من المعاناة ومقابلات وتغيير شركات تحقق حلمي واصبحت مبرمج موبايل , الحمد لله صبرت ونلت مع اني تعبت واتبهدلت بس وصلت للي انا بدي اياه .

صحيح انو الشركه جنب يافطه نهايه الدنيا بس مش مشكله بصبر وصحيح انو الواحد ما بياخد غير 150 دينار بس مش مشكله بصبر وصحيح انو الدوام 8 ساعات بدون فيس بوك !! بس مش مشكله بصبر .

راح اصبر واصبر لحتى اوصل للمرحله الي بحلم فيها واصير مبرمج موبايل واكون مميز عن الكل واهم شي اني راح اطلع من سجن مايكروسوفت واخلص منهم 😀

وهاي المقاله مش عشان احكي عن حالي لا , هاي عشان احكي عن غيري اللي بداوم في شركه جنب بيتو ومش عاجبو واللي بداوم عند قريبو وهوه مش فاهم وين الله حاطه ومش عاجبه .

بحب احكيلكم ولكل الشباب والاهم الشباب احنا الشباب بايدنا كل اشي معنا الدنيا بتكبر حطوا هدف الكم وراح توصلو لو انو باخر الدنيا … لو انو بسابع ارض راح تصلو ….

وعلى قوله المثل الشباب الشباب الشباب …..

غرور ولا شو ؟؟

غريبين الناس لما الواحد بعمل اشي صغير ببقى شهرين يحكي انا عملت وسويت وانا وانا ما في حد متلي , طيب انت الوحيد اللي عايش على الارض مثلا !!!!!

  ولا لما يصير معو اشي انا وانا وانا … يا بني آدم اتقي ربك اللي خلقك خلق غيرك وانت مش الوحيد على الوجه الارض , والتواضع سمه جميله عند الانسان اللي اغلب الناس بفتقدوها ..

طيب بلاش يمكن الاخ مريض والله يعينو على علتو , بس على القليله لما تغلط اعترف بغلطك وما تعمل حالك انك فاهم وانت غلط !!!!!

(واخر شي لانه انا ما بحب اطول بالكلام (في كتير على الارض وكلهم احسن من بعض(

Arab Idol

برنامج لطيف وخفيف وجميل بس سخيف بنفس الوقت وتافه ومن البرامج المصنوعه عشان تلهي المشاهد عن الواقع , المشاهد بدور على شي يلهيه عن الواقع ما بدو يشوف الناس بتموت ما بدو يسمع عن بلد بضيع , اغتيل فلان مات علان , بهرب من الواقع عن طريق هاي البرامج السخيفه.
والحلو بالموضوع انو القنوات مجهزه البرامج والمواطن العربي القدير مجهز نفسو على التلفاز وبحضر كل ما في التلاجه عشان يحضر البرنامج وبلم العيله وبقعد حضرتو وبتناسى اللي بصير بفلسطين والعراق وسوريا ومصر والبلاد العربيه عشان يرفه على نفسو على اساس انو عايش على القمر ..
اما القنوات برنامج ورا برنامج ما بلحق الواحد ينسى اللي جاي واحد ولحق يلي بتلحق وكل قناه وحسب فلوسها , مثل القناه المحترمه mbc  معها فلوس وبدها تلهي الشعب جابت 3 اشخاص ويلا صار عنا برنامج المهم نلحق بالركب …
لحد هون وبكفي وبليز بليز صوتولي ازا عجبكم الحكي  🙂

عالم جميل

عالم جميل مع الزين عالم جميل مع احلى نصب مع احلى ضحك على اللحه, شركه عايشه على النصب مع انو خدماتها قويه وتغطيتها رائعه بس نصابه !!!!!!!
حتقولي بدي دليل افتح  الفيس واكتب زين وشوف النتائج كل الناس كلهم بقولو انها نصابه
طيب لمتى يعني كل الناس محتاجاها وكانه ما في غيرها .
وكمان غير هيك سياسه التحميل المحدود وباقل السرعات يعني احنا الدوله الوحيده الي فيها هيك شي .

Post Navigation